Frisk bølgjetur.

Søndagens padletur gjekk til Smelværet. Nina, Roy Ove og eg padla frå Staveneset i flott vintervêr med eit par plussgrader og litt austavind, så vi hadde vinden og bølgjene med oss utover mot Kråka.

Vi starta på is inne i Vaulen, Roy Ove er klar med alternativ bruk av padleåra.

Ei av dei mange grunnene det bryt på nord i Smelværet.

Vi var bortom eit par grunner der det braut ganske kraftig. Eg synest det er fasinerande å vere nær dei voldsomme kreftene i slike brotsjøar, og kjenne bevegelsane dei lagar i sjøen, - dei kjenner ein godt i ein kajakk !

Roy Ove "snusar" på ein brotsjø.

Nina med Kinn og Reksta i bakgrunnen.

Fornøgd gjeng :-)

Ikkje så lett å få auge på Nina i bølgjene.


Det var litt grov sjø i dag, krappe bølgjer som gav litt utfordringar og testa balansen til båt og mannskap. Vi leika oss ei stund her på utsida før vi padla inn i Smelværet og rasta på kaia der. Vi får vel snart rekning på havneavgift dersom eigaren av havna les bloggen min :))

Godt å finne ly for austavinden.

Ombordstiging.

 Det hadde friskna til litt, så det vart ein ganske tung tur inn att mot Staveneset, med grov sjø og vind rett i mot. Vi nådde omsider Faneskjera der vi tok ein liten pause på lesida. Derifrå kom vi fort i ly for Staveneset, og siste stykket gjekk lett.

Pause ved Faneskjera.

Stavenesvågen.
Ein frisk tur på godt 12 km. som gav god trim. Vi brukte omtrent 4 timar.
Heile albumet finn du HER

Padling og sushi !

Det vart ei tur "på sparket" i dag. Sidan det såg usikkert ut med tur i morgon, og fjorden låg der stille og fin og lokka, bestemte eg meg brått og uventa, og ein god halvtime etterpå var eg i kajakken her ved Yndestadkaia. Stongfjorden er eigentleg litt kjedeleg å padle, men grei nok av og til, og i dag fann eg på å padle halve fjorden ut og ta avstikkaren inn Eidsfjorden.  Kjedeleg å padle den og for så vidt, mykje meir spennande å køyre den, men eg har ikkje vore inn her i kajakken før.

Flotte svaberg i Eidsfjorden

 Ikkje så lett å sjå, men vegen mellom Stongfjorden og kommunesenteret Askvoll går bort i fjellsida.

Fismen, veglaus og fråflytta gard på vestsida av Eidsfjorden.

Ikkje lett å drive gard her.

Frå Fismen mot Nordeidet

Eg padla heilt i botnen av Eidsfjorden, der kom eg ikkje lenger og måtte sjølvsagt snu å padle ut att.
Det var mykje fugl å sjå, hegre er ikkje noko uvanleg syn innover her, men store mengder skarv er litt meir uvanleg. Eg er usikker på om det er silda den kjem etter, eller om det er ruskeveret ute i havet den søkjer ly for. Eit heilt fugleberg av skarv sat i alle fall i ein hammar ved utløpet av fjorden og flaug der i frå då eg nerma meg.

Frå Årevika i Størdal.

Eg tok ein kopp varm solbærtoddy og ein kvikk-lunch ombord i dag, utanfor Størdal, før eg padla siste biten inn att Stongfjorden mot kaia heime.
Etter godt to og ein halv time og 15 km. i kajakken hadde eg opparbeidd skikkeleg god matlyst, men eg må sei at eg var noko spent på middagen i dag. Fruen hadde vore på delikatessebutikken i Askvoll og kjøpt sushi, og det har vi ikkje smakt før. Etter ein dusj og ein lur på sofaen var det tid for å utfordre smaksløkane med nye inntrykk.

 Sushi frå Askvoll Sjømat & Delikatesser kan anbefalast !

Vi vart slett ikkje skuffa. Kjempegodt ! Og eit glas god kvitvin attåt gjorde ikkje måltidet verre :-)
Askvoll Sjømat og Delikatesser AS finn du på Facebook

Alle bilda frå turen i dag er tekne med mobilkamera, og resten av albumet finn du HER

Padling og litt historie.

For godt og vel tusen år sidan budde det ein villstyring med namn Ingolfr Arnarson i Rivedal. Eg veit ikkje om han padla, men båt hadde han i alle fall, om enn litt større enn ein kajakk, for etter å ha tatt livet av to av sønene til Atle Jarl, ein storkar som budde lengst inne i Dalsfjorden, måtte han flykte landet. Han hoppa i båten og sette kursen for Island, og der han vart han verande og la grunnlaget for dei første busetnadane på sagaøya. I 1907 sette Islendingane opp ei svær statue av Ingolfen i Reykjavik, og ein kopi av denne vart reist i Rivedal i 1961. Eg stoppa på og helsa på han då eg køyrde forbi på veg til søndagens padletur.

Ingolfr Arnarson

Meldingane for søndagen var dårlege med mykje vind, så valget fall dermed på Dalsfjorden med start frå Eikenes. Eg fekk med meg Nina, og vi møttest på Eikenes og var klar i båtane i halv tolvtida.

Nina på veg ut frå Eikenes.

Det har vore ferjetrafikk mellom Dale og Eikenes i 75 år, men no er dette snart historie. Veg inn fjorden og bru over til Dale er under bygging og skal stå ferdig i 2013. Litt av målet med dagens tur var å inspisere framdrifta av vegarbeidet. Arbeidet vart faktisk påbegynt allerede i 1974, men vart stoppa fem år etter, og no i haust vart arbeidet teke opp att.

Søndag og stille på anlegget.

Her enda det i 1979, etter 5 års drift var det bygt 4 km. veg inkludert 500 m. tunell.

Etter å ha inspisert vegarbeidet på nordsida av fjorden padla vi vidare innover forbi Ottersteinen til Fossevika. Vi padla forbi eit oppdrettsanlegg for blåskjel som låg langs med land, slik ser det ut under overflata :

Blåskjel.

 Ottersteinen, utan veg i dag, men snart kjem det eit brufeste her og då ordnar nok det seg.

 Rast i Fossevika.



 I Fossevika var vi på land, godt med niste og varm drikke, før vi padla vidare over til Dale og vidare utover på sørsida av fjorden. Her var det blikkstille og klårt i sjøen, og langs land på sørsida av Dalsøyna var det tett i tett med kråkebollar under overflata.

Kråkebollar i fleng, eit sjeldan syn.

Langs land på sørsida av Dalsøyna.

I Fossevika fekk eg melding frå Lasse. Han hadde padla frå Holmedal og var kommen inn til Eikenes og visste at vi var på tur i området. Vi såg etter han på veg utover, men det vart ikkje til at vi traff han. Han var forbi Eikenes kommen på veg heimover før vi kom ut att.
Vi var tilbake på Eikenes i halv firetida, fire timar etter at vi la ut og hadde tilbakelagt nesten 16 km.
Flott tur i gråvêr med lette regnbyger.
Takk for turen Nina !
fleire bilder frå turen HER

Meir grått og vått.

Eg hadde vel egentleg slått i frå meg padletur på søndagen, trur eg, men så var eg innom Facebook på laurdagskvelden, og plutseleg hadde eg ein avtale med Odin; padletur til Smelværet med start søndag kl. 10 frå Staveneset. Så der gjorde eg det igjen gitt ! Det er ikkje lenge sidan eg låg under dyna ein søndagsmorgon og angra på at eg hadde avtalt tur så tidleg. Men ein avtale er ein avtale, så kl.10 var Roy Ove, som òg vart med, Odin og eg klar for tur.

Roy Ove er klar og ventar på fotografen.

Hauk over hauk. Odin òg skal ha bilder til bloggen sin.

I motbakke nord om Ryggene.

Vi padla utover forbi Ryggene og kom ut i lange fine dønningar vidare mot Smelværet. Å padle i slike dønningar får meg alltid til å erkjenne kor liten og maktlaus ein er mot kreftene i naturen.

Rikeleg med skarv her ute, - her sit ein flokk på tørk.

Beinstrekk

Fornøgde padlarar i regnbyga.


Kaffi og niste inntok vi på Sandholmane. Til no hadde vêret vore ganske bra, nesten vindstille og lite regn, men rasten vart avbroten av ei regnbyge, og vi pakka sammen og kom oss i båtane att. Inn att la vi turen om Melsholmen der to selar heldt auge med oss.

Odin ved Melsholmen.

Tilbake til start.

Vi brukte ca. tre timar på turen som vart nesten 11 km.
Fleire bilder frå turen HER
Odin sin versjon HER

Grått og vått.

Det har vore eit skikkelig grisevêr i helga, men eg hadde bestemt meg for ein padletur, så i dag køyrde eg i Flokeneset og sjøsette der. At eg valde Flokeneset var mest for å komme i ly for sønnavinden, men og fordi det er eit flott padleterreng med holmar og skjær og mange flotte vikar. Det regna ikkje då eg gjorde meg klar og la i frå land, men det gjekk ikkje lang tid før det hølja ned igjen, og det gjorde det stort sett heile turen. Godt å ha tørrdrakt når det er like vått (nesten) over vassflata som under.

Ut frå Flokenesvågen.

Skarv ved Flokeneslykta.

Eg padla ut til Flokeneslykta før eg sette kursen sør og vestover mot Stavestranda. På avstand ser terrenget frå Vågane og utover stranda kjedeleg ut, men på nært hold er det langt meir spennande med holmar og vikar utover.

Fiskematautomat.

Frå Holmen.

Strandhogg ved Holmen, - måtte snu båten for å sleppe å ause.

Vestover frå Holmen.

Eg var i land ved Holmen, som ligg vest på Stavestranda, men det vart ein kort rast i grisevêret. Slike dagar hadde det vore kjekt med eit lite telt som er enkelt og kjappt å slå opp, slik at kaffien ikkje blir så tynn og kald på ein augneblink, - nokon som har eit godt tips ?

Ser du godt etter finn du ein oter som nett har oppdaga meg. Sekundet etter var den borte. (Alle bilda er klikkbare, og klikkar du ein gong til får du dei i full størrelse)

Returen padla eg langs land innover til Nærvika og Bråtevika. Oter såg eg fleire gonger på turen, og mykje fugl. Mest skarv, og inne på Vågøyna letta det ei stor havørn då eg for forbi.

Høgeloftet - tøfft namn på ein tøff holme.

Hyttefeltet i Nærvika.

Frå Nærvika

Frå Flokenesvågen.

Flokeneskaia.

Eg var tilbake i Flokeneset i halv fire tida, fire timar etter at eg starta. Tett opp under 17 km vart det i dag.
Heile albumet frå turen HER

Første etappe.

I år har eg sett meg som mål, i lag med eit par tre andre i klubben, å padle til Norges Padleforbubd sitt distansemerke i bronse. Då må eg loggføre 400 km i kajakken i løpet av året. Eg har ikkje ført nokon nøyaktig logg for 2010, men eg har padla tett opp under 400 km så det burde vere eit realistisk mål å nå.(På padleforbundet sine sider, og på diverse andre padlebloggar, ser eg at dei ivrigaste har padla både eit og to tusen km. i løpet av fjoråret, og då blir 400 for peanuts å rekne.)
2. nyttårsdag padla eg første etappe i lag med Roy Ove. Vi la ut frå Staveneset i halv elleve tida og padla utover forbi Faneskjæra og ut til Kråka. Når det er litt drag i sjøen er det i tillegg til store dønningar, ganske rotete sjø rett nord om her, og mange plassar bryt det kraftig. På kartet ser ein at havdjupna stig bratt frå rundt 200 meter til nærmare null, og det forklarar vel kvifor det er slik.

I dag var det såpass rotete at eg ikkje torde å sleppe padleåra for å ta bilder før vi var i litt smulare farvatn.       

 Nord i Smelværet

 Surfebølge for dei som vil..

Det var fjærande sjø, og medan vi låg og pausa og såg på ei grunne der det braut kraftig, merka vi brått at det var like før det braut der vi låg også, så vi fann ut at det var best å flytte på oss. Vi tok årane fatt, og berre eit lite halvminutt etter braut det kraftig der vi nett hadde vore, - vi hadde ganske sikkert vorte våte i håret om vi hadde lagt i ro.

Inne i Smelværet er det sjelden stor sjø, og vi sette kursen sørover mot Smelværkaia der vi var i land og fekk i oss niste og varm drikke, før vi padla vidare sørover mellom øyane og over Smelværosen til Heggøyna.

Rotvelt etter ein storm for to år sidan.

Her helste vi på selkolonien som held til her. Dei låg på svaberga rett over flomålet, men var snare å komme seg ut i når vi nærma oss. Ikkje lett å få talet på dei, men eg tippar det var 30 - 40 dyr rundt oss. Eg forsøkte å ta bilde av dei under overflata utan å lukkast, men eg fekk bilde av ein kajakk og ei padleåre.

Poserande padleåre.


Det lei på dag, så vi tok fatt på heimvegen og var tilbake i Staveneset godt fire timar etter at vi for.

Det ser imponerande ut, men båten står ganske støtt :-))

Første etappe på dei 400 vart på knappe 15 km, så no er det berre 385 km. igjen.  Lene har ordna loggbok på nett, eller spreadsheet på nynorsk, og turen er logga.

Heile albumet frå turen HER