27 mars 2011

Padling med litt av kvart.

Det har vore mykje jobb og lite padling dei siste vekene, men eg kom heim tirsdag til tre veker fri, og i dag vart det endeleg tid og vêrforhold til ein tur. Vind og regn/snø i føremiddag, men det betra seg ut på dagen. Nina vart med, og vi padla frå Staveneset i totida i ettermiddag.
Litt vind og grov sjø frå nordvest møtte oss i det vi runda Staveneslykta, og vi padla rett imot utover mot Ryggene. Her er det grunnt, og sjøen var ganske grov og rotete der det ikkje braut. Vi sette først kursen mot Kråka, men ombesemte oss og padla sørvestover i le for Smelværet, der sjøen vart mykje rolegare.

Med kurs for Heggøyna.

Sola gløtte fram innimellom og vi småprata og padla i roleg tempo over mot Heggøyna. Her vart det rast, litt mat, varm sjokoladedrikk a la "rett i koppen" - eller var det kroppen ? - frå Toro, og litt sjokolade med frukt og nøtter frå Freia. (Nam)
Godt med energipåfyll før siste etappe tilbake til Staveneset via Melsholmen.

 Rast på Heggøyna



Ved Melsholmen

Frisk tur, litt utfordringar i bølgjene, litt sol, litt vinter, litt vår, litt sur byge inn att mot Staveneset, godt selskap, god trim, alt i alt ei flott naturoppleving !
Ca 11 km.





06 mars 2011

Sur tur.

Eg køyrde i Staveneset i håp om å komme meg til havs i dag, men vind og litt grov sjø, pluss at eg ikkje hadde sjekka yr.no før eg køyrde heimanfrå, fekk meg til å ombestemme meg. I staden for å padle vestover, vende eg nasen mot aust og padla inn att fjorden.

Stille nok inne på vågen i Staveneset.

Stavenesvågen har også si historie, kanskje skal eg skrive litt om den, men ikkje i dag.


Frå Staveneset mot Follevåg og Størdal.

Det vart mykje sur motvind over mot Folvågneset, og sidevind vidare innover fjorden. At temperaturen så vidt var over null, gjorde det ikkje noko vidare kjekt å vere på sjøen i dag. Det vart ein kort tur på land på Folvågneset, kaldt på fingrar og tær og ikkje råd å finne ly nokon stad, så det var berre å komme seg i båten att å sette kursen mot kaia heime.
Ved Folvågneset.

Mot vest.

Frå Folvågneset mot Årskogen og Underset.

Båt og mannskap vel heime, men bilen sto att i Staveneset, så då var det berre å kle seg i ny drakt, finne sykkelen og hente bilen heim òg. Så i dag vart det 12 km. padling og ca. 10 km. sykling . Det er vel det dei kallar kombinert i sportsverda.

Dagens tur, ca 12 km.

03 mars 2011

Sunnfjords perle !

Søndag hadde Nina og eg Flokeneskaia som utgangspunkt for padleturen.Vi møttest som avtalt klokka 11, og litt etter var vi på veg ut Flokenesvågen i pluss 4 grader, gråvêr med litevetta regn og omtrent null sekundmeter vind. Fine padleforhold, men ikkje akkurat det yr.no hadde lova eit lite døgn i førevegen. Men pytt pytt, litt småregn gjer ingen ting når ein likevel held seg så nær det våte element.

Frå Flokeneskaia mot vest, Svanøy lengst vekke midt i bildet.


Klar til å gå ombord.

Målet i dag var Svanøy, Sunnfjords perle, og vi sette kursen dit. Svanøy ligg i utløpet av Førdefjorden, har Stavfjorden på sørsida og Brufjorden på nordsida og høyrer til Flora kommune. Ei skogkledd og idyllisk øy med ei mengd mindre øyar, holmar og sund som utgjer eit fantastisk padleterreng.
Mellom Austneset og Langøya

frå Austnesvågen.

Svartestilla

Mat og kaffi ved butikken i Svanøybukt

Vi gjekk på land i Svanøybukt og lånte oss eit bord ved butikken der vi åt nista. Litt fotarbeid gjer også godt etter ei økt i kajakken, så vi rusla ein tur oppover til Svanøy Hovedgård.

Svanøy Hovedgard.

Kyrkjegarden med steinkrossen.

Frå Svanøy Hovedgard


Øya har ei rik historie, og har spor etter busetnad som kan daterast 4000 år tilbake i tid.
Eirik Blodøks, ein av kongane i vikingtida, var truleg fødd på Svanøy og oppfostra på garden Erikstad.
På kyrkjegarden står ein steinkross med runeskrift som vitnar om Olav den Heilage si kristningsferd om lag på same tid.
Her har også m.a vore gruvedrift etter koparkis, saltkokeri og klebersteinsbrot.
Øya lever ikkje berre på gamal historie, i dag er her mange bedrifter; havbruksanlegg, røykeri, båtbyggeri, jordbruk, hjortesenter og fleire andre.
Men i dag virka det ganske stille på øya. Søndag og VM på ski er vel noko av forklaringa, og ellers er det vel ikkje akkurat sesong for yrande folke- og båtliv. Sikkert noko heilt anna ein sommardag i ferien.

 Svanøybukt.

Tilbaketuren la vi om Flokeneslykta, og vi var tilbake på Flokenes kai om lag 4,5 time etter at vi starta.

 Flokeneslykta.

 Padleruta, ca 17 km.

Fin tur i dag, og Svanøy er eit flott mål for padleturar med utgangspunkt frå Flokenes, men også Stavestranda eller Grimelida er gode utgangspunkt. Ein tur Svanøy rundt er eit av sommarens ekspedisjonsmål.
Fleire bilder HER

Toreheia 14. februar.

Siste dagen med godvêr på ei stund seier Yr.no, frå i morgon er det synnavind og regn i dagesvis, så eg pakka sekken med litt mat og kle o...